«Эссе «Монь методическяй вешфксоне» («Мои методические находки») Мон- мокшень кялень учителян. Школась- монь эряфонь кизе. И тя аф шава валхт. Пяк ...»

Эссе «Монь методическяй вешфксоне» («Мои методические находки»)

Мон- мокшень кялень учителян. Школась- монь эряфонь кизе. И тя аф шава валхт. Пяк кельгса эсь тевозень, сяс эрь шиня сашендан шабатнень ёткс пара мяльса. Нинге пяк кельгса эсь шачема- касома уженяньконь- Мордовиять, сонь мазыдонга- мазы перьфпяленц, ломанензон и тя кельгомать старандан пачфтемс иттнендиге.

Монь койсон, мокшень кялень тонафтысь сотф пяк кемоста марнек перьфпяльть мархта, лия национальностень ломаттнень мархта, и мон тонафтан эсь шабанень эса сянди, штоба синь ванфтолезь аф аньцек эсь культураснон, кяльснон, но тага нинге тонафнелезь культурать и кяльть иля нароттнень ёткса.

Мялезе максомс содамашинень иттненди, тонафтомс синь мокшень кяльса корхтама, кърхкалгофтомс содамашиснон мокшетнень и эрзятнень эряфснон коряс. Вдь минь эрятама мокшэрзянь масторса. Сяс аф ащан фкя вастса, яла вешан од сатфкст.

Штоба урокне ётнельхть мялень салазь, мокшень кялень вятити эряви улемс лама содайкс, мушендомс кит- ятт эрь шабать ваймос. Аньцек тяфта сатовихть сатфкст идень тонафтомаса. Кепотьксонди, кода ушеткшнеса урокть эрь шиня? Иттнень мархта корхнемаста. Синь азондсазь эсь тевснон. Мезе няйсть, мезе кульсть. Тяфта синь сяда шарьхкодьсазь цебярь тефнень и кальдяфнень, тонафнихть арьсема. Седикс- ваймокс корхнематне меле лезнихть иттненди конкурсненди, олимпиадатненди анокламста.

Койсон, тяфта тевть ладямац лездсь ученикозенди сатомс оцю сатфкс. Цыганов Александрсь Межрегиональнай олимпиадаса 2016 кизоня ульсь призёркс.

Урокне, конатнень ётафнесайне, фалу кандыхть мезнявок одня. Кочксян мялень кеподи заданият, упражненият, уроконь тевс нолян содама ёфкст, валмуворкст, содамканят-моронят. Эрь урокти сувафтан налхксемань элемент, штоба шабатнень кеподель мяльсна, штоба маштольхть арьсема, эрь уроксь лядоль ваймозост сембе пингс.

Сувафнян упражненият, коса улихть тяфтама заданият:

Рядса максф валхнень азомс смузень коряс фкя валса.

Сёрматфть явомс валрисьмова.

Эрь валрисьмоть мельгя путомс лотксема тяштеня.

Шабатне пяк кельгсазь мокшэрзянь ёфкснень кулхцондомаснон, азондомаснон. Мъзярда корхтамась моли мокшень стирень- авань да цёрань лептнень колга, тяса лятфтавихть лемонь путомань койхне. Тяса или тонафтысь корхтай, или кулхцондови тонафнинь аф оцю азкс. Максовихть тяфтама лепт: Виряня, Дуболга Пичай, Гарай, Пургай, Байка, Цяцяня. Максовихть кизефкст: кодама существительнайса тиевсть лептне? Коса сидеста синь васьфневихть? Максевийхть ли тяниень пингса тяфтама лепт? Тяса максян шабатненди тяфтама кудонь тев: рисавамс ёфксонь кельгома геройснон.

Мяльстуф материал максови «Мокшень щаптне-каряпне» темать коряс. Тя урокть ётафнеса школань музейса, коса лама кочкаф сире пингонь щапт-каряпт.

Республикасонк оцю мяль шарфтови мокшэрзянь культурань и кялень ванфтомати. Пяк пара ся, мес миньцонк лисендихть «Мокшень правда» газетась, «Мокша» и «Якстерь тяштеня» журналхне, мокшень кяльса тяштьф книгат, конат лездыхть монь тонафтыень тевснон. Но сембода пяк тейне лезды «Якстерь тяштеня» журналсь. Сон аш кода аф кельгомс и аф шнамс. Иттненди фалу ули мезе няфтемс, ули мезе лангса арьсемс. Марса сотцесаськ кроссворттнень, ребуснень, лия прянь синнемкатнень. А кда школасонк ётафтови кодамовок ила, эста кондяснихть сценкатне, стихотворениятне, моротне.

Эрямась моли инголи, кизоста кизос лиякстоми, сянкса учительти эряви улемс фалу сотф эряфть мархта, штоба касфтомс сембе ширде развитай, пара седи ломатть.

Сембе эряфозень ладяйне стане, штоба шабатне кельголезь предметозень, содалезь мокшень койхнень-обуцятнень, илатнень. И афольхть визде мокшень кяльть эзда. Моральхть эсь мокшень кяльсонк ёмла Родинаньконь и оцюдонга оцю Россиять колга морхт! Фалу пара мяльса кулхцондан, мзярда иттне морайхть морот тядянь кяльса.

Мяльс туф (туф мяльс)материал максови «Мокшень щаптне-каряпне» (темать коряс.)? Тя темать коряс урокть ётафтса школань музейса. Мокшень щаптне-каряпне лувость мазыста тифста, сельме каяма вастокс ащесть, кода ингольде пинкнень, станя жа и тя пинкть.